ரஞ்சி: தமிழகம் இன்னிங்ஸ் வெற்றி | ஜனவரி 20, 2023

சென்னை: அசாம் அணிக்கு எதிரான ரஞ்சி கோப்பை லீக் போட்டியில் அசத்திய தமிழக அணி, இன்னிங்ஸ் மற்றும் 70 ரன்கள் வித்தியாசத்தில் வெற்றி பெற்றது. 

இந்தியாவில் ரஞ்சி கோப்பை கிரிக்கெட் தொடர் நடக்கிறது. சென்னையில் நடந்த ‘பி’ பிரிவு லீக் போட்டியில் தமிழகம், அசாம் அணிகள் மோதின. முதல் இன்னிங்சில் தமிழகம் 540, அசாம் 266 ரன்கள் எடுத்தன. மூன்றாம் நாள் முடிவில், ‘பாலோ ஆன்’ பெற்ற அசாம் அணி, 2வது இன்னிங்சில் விக்கெட் இழப்பின்றி 66 ரன் எடுத்திருந்தது. 

நேற்று நான்காம் நாள் ஆட்டம் நடந்தது. சாய் கிஷோர் பந்துவீச்சில் சுபம் (33), ராகுல் (40) அவுட்டாகினர். ‘சுழல்’ வீரர் அஜித் ராம் வலையில் ரியான் (15), கேப்டன் கோகுல் சர்மா (2), சுவர்பம் (1) சிக்கினர். ரிசவ் தாஸ் (58) அரை சதம் கடந்து ஆறுதல் தந்தார். சுனில் லசித்தை (0) வெளியேற்றிய அஜித் 5வது விக்கெட்டை கைப்பற்றினார். அசாம் அணி இரண்டாவது இன்னிங்சில் 204 ரன்களுக்கு ஆல் அவுட்டாகி வீழ்ந்தது. 

தமிழகம் சார்பில் அதிகபட்சமாக அஜித் ராம் 5 விக்கெட் சாய்த்தார். தமிழகத்திற்கு 7 புள்ளி கிடைத்தது.  

நடப்பு ரஞ்சி ‘சீசனில்’ தமிழக அணி முதல் வெற்றி பெற்றது. இதுவரை 6 போட்டிகளில் தலா ஒரு வெற்றி, தோல்வி, 4 ‘டிரா’ என 15 புள்ளியுடன் ஐந்தாவது இடத்தில் உள்ளது. வரும் 24ல் இதே மைதானத்தில் நடக்கவுள்ள அடுத்த லீக் போட்டியில் தமிழக அணி, சவுராஷ்டிராவை சந்திக்கவுள்ளது.